Salhus med Salhus Tricotagefabrik til venstre i biletet.

I 1859 får Phillip Christian Clausen og Johan Ernst Christian Ramm festekontrakt frå Søren Hammer på ei strandtomt i Nordrehamn i Salhus. Festebrevet på grunnen i Salhus er datert 1. august 1859. Ni dagar seinare byrja arbeidet på fabrikken, og same haust var produksjonen i gang på den første fullmekaniserte trikotasjefabrikken her til lands. Trebygningen hadde to etasjar og målte kring 37 x 8 meter. Produksjonslokala var lange og smale med mange vindauge for at lystilhøva skulle bli så gode som mogeleg. Vinteren 1859/60 reiste folk frå bedrifta rundt til 25 norske byar for å visa fram prøver, som vart svært godt mottekne.